यस्ता व्यक्तिलाई कारवाही गर्नैपर्छ

By: ParbatKhabar
9 months ago
view: 91

पूर्वप्रधानमन्त्री एवं नेकपा नेता नेपालले कोही व्यक्तिले पार्टी छाडेर जाँदैमा नेकपा नफुट्ने दाबी गरे । ओलीमाथि कारबाही भए पनि पार्टी एकता यथावतै रहने उनले बताए । उनले केपी ओलीलाई लक्षित गर्दै भने, ‘पार्टी छोडेर हिँड्नुभयो भने उहाँको कुरा भो । कुनै पनि व्यक्ति कुनै पनि पार्टी नबस्न सक्छ, त्यो कुन ठूलो कुरा भयो र ?’

आगामी मध्यावधि चुनावमा पार्टी एकढिक्का भएरै जाला त भन्ने पश्नमा उनले चुनाव नहुने बरू संसद पुनर्स्थापना हुने बताए । अनलाइनखबरसँगको विशेष कुराकानीमा नेता नेपालले भने, ‘चुनावको प्रश्नै छैन, संसदको पुनर्स्थापना हुन्छ ।’

प्रस्तुत छ नेता नेपालसँग अनलाइनखबरले गरेको कुराकानी-

प्रधानमन्त्री ओलीले यसरी संसद विघटन गर्नुहोला जस्तो तपाईंलाई लागेको थियो कि थिएन ?

गर्नुहुन्न भन्ने पनि थियो, गर्न पनि सक्नुहुन्छ भन्ने पनि लाग्थ्यो । तर मानसिक रूपमा चाहिँ म तयार थिएँ । उहाँले यस्तो कदम चाल्न सक्नुहुन्छ, किनभने मान्छेले जब बुद्धि गुमाउँछ, जब विवेक गुमाउँछ, जुनसुकै पनि कदम चाल्न सक्छ । जुनसुकै पनि कदम चाल्न सक्ने मान्छे भनेर मनमा कताकता लागिरहेको थियो । तर, पनि यस्तो नहोला कि, उहाँसँग जोडिएका कतिपय साथीहरुले भूमिका खेल्नुहोला कि, उहाँलाई सत्मार्गमा ल्याउन प्रयास गर्नुहोला कि भन्ने पनि झिनो आशा पनि बाँकी थियो ।

राष्ट्रपतिसँग केही आशा थियो कि ?

राष्ट्रपतिज्यूले पनि यसबारेमा गलत कदमलाई साथ नदिनु होला । संविधानको पक्षमा उभिनुहोला । गणतन्त्रको मूल्य र मान्यता हो, यसलाई जोगाउनका लागि पनि विचार गर्नुहोला । गणतन्त्रमाथि अनेक किसिमको गतिविधि चलिरहेको छ, यस्तोबेलामा उहाँबाट यस्तो कदमको मैले त आशा गरेको थिइनँ ।

अब प्रधानमन्त्रीले संसद विघटन गरेर मध्यावधि निर्वाचनको मिति घोषणा गरिसक्नुभएको छ । नेकपा स्थायी कमिटीले उहाँमाथि अनुशासनको कारबाही गर्ने निर्णय पनि गरिसकेको छ । अब हुन्छ ? नेकपा फुट्छ ?

यो असंवैधानिक र निरङ्कुश कदम हो । उहाँ (केपी शर्मा ओली) को यो निर्णय पार्टी पद्धतिको विरुद्धमा पनि छ । पार्टीको नेताका हैसियतले उहाँले पार्टीको पनि विश्वास गुमाइसक्नु भएको छ । दलको विश्वास पनि गुमाइसक्नुभएको छ । दलमा उहाँको बहुमत छैन । संसदीय दलमा पनि उहाँको बहुमत छैन । प्रतिनिधिसभाका सदस्यहरूमध्ये पनि ९० जना उहाँको विपक्षमा उभिइसकेका छन् ।

अझ दुईजना मन्त्रीहरू (घनश्याम भुसाल र योगेश भट्टराई) अनि रघुबीर महासेठलाई पनि जोड्ने हो भने अहिलेको संख्या ९५ पुगिसकेको छ । उहाँ अत्यन्तै अल्पमतमा पुगिसकेको व्यक्तिले संसद विघटन गर्नु यसै पनि गलत हो । विघटन गर्ने संवैधानिक अधिकार संविधानले दिएको छैन । अल्पमतमा पुगेको मान्छेले गर्ने त प्रश्नै उठ्दैन ।

उहाँले आफू अल्पमतमा पुगेको तथ्यलाई लुकाएर जसरी राष्ट्रलाई नै संकटमा पुर्‍याउनुभयो, लोकतन्त्रलाई नै धरापमा पार्ने काम गर्नुभयो । गणतन्त्रविरोधी शक्तिहरू उठिरहेका बेलामा गणतन्त्रप्रति वितृष्णा गर्ने पैदा गर्ने ढंगबाट उहाँका कदमहरू जसरी देखिए । यसबाट के बुझिन्छ भने कमरेड केपी ओलीमा यो देश, लोकतन्त्र र गणतन्त्रप्रति कुनै माया छैन ।

राजनीतिक स्थायित्व भन्ने कुरा व्यक्तिले हुँदैन । नेकपाको सरकार छँदै थियो, बहुमतको सरकार नै थियो। पार्टीले उहाँलाई प्रधानमन्त्रीबाट हट पनि भनिसकेको थिएन । पार्टीको छलफलको विषय नै बनेको थिएन ।

त्यस्तो अवस्थामा उहाँ जुन हिसाबले उत्रिनुभएको छ, त्यसले उहाँमा सर्वसत्तावादी सोच देखा परेको देखिन्छ । उहाँको बारेमा कसैले आलोचना गर्न नपाउने, उहाँले विधि पद्धतिमा बस्नुपर्छ भन्न पनि कसैले नपाउने, उहाँले विधि र पद्धतिको पालना पनि गर्नु नपर्ने, उहाँका सबै तरिका र रबैया हेर्दाखेरि उहाँबाट मुलुक र संविधानअनुसार अघि बढ्न नसक्ने अवस्था प्रष्ट भइसकेको छ ।

आइतबारको स्थायी कमिटी बैठकले प्रधानमन्त्रीलाई अनुशासनको कारबाही गर्न केन्द्रीय कमिटीलाई सिफारिस गर्ने निर्णय गरेको छ, उहाँले आत्मालोचना गरेर सच्चिने ठाउँ छैन ?

उहाँले संसद विघटनको कदम चालिसकेपछि झूटो बोलेर अर्का कार्यकारी अध्यक्षलाई पछिसम्म पनि अल्मल्याइरहनुभयो । स्थायी कमिटीको बैठकमा उहाँले के भन्नुभएको थियो भने संवैधानिक परिषद्मा कुनै पनि नियुक्ति गरिएको छैन । कति ढाट्नुहुँदो रहेछ भन्ने त बैठकमा उहाँको प्रस्तुतिबाट थाहा हुन्छ । त्यो बैठकमा अध्यादेश (संवैधानिक परिषद्सम्बन्धी) फिर्ता लिने, जुन सर्वसम्मतिले निर्णय भएको थियो, त्यो फिर्ता नलिएर निर्णयको ठाडो उल्लङ्घन गर्ने तहमा पुग्नुले उहाँको प्रवृत्ति प्रष्ट हुन्छ । पार्टीको बैठक मान्दिनँ, निर्णय स्वीकार गर्दिनँ भनेर सार्वजनिक अभिव्यक्ति दिन गर्नुहुन्छ । प्रत्येक भेटघाटमा उहाँ कति निरङ्कुश पाराले चल्न चाहनुहन्छ भन्ने कुरा प्रष्ट हुन्छ।

स्वाभाविक रूपले यस्ता व्यक्तिलाई पार्टीले कारबाही गर्नैपर्छ । पार्टीको स्थायी कमिटीले सिफारिस गरिसकेको छ, केन्द्रीय कमिटीले उहाँलाई कुन-कुन पदबाट कारबाही गर्ने हो । अध्यक्षमा बस्ने नैतिक अधिकार गुमाइसक्नुभयो । केन्द्रीय कमिटी बैठकमा बस्न लायक पनि हुनुहुँदो रहेनछ । वास्तवमा प्रश्न खडा हुन्छ, उहाँ पार्टी सदस्यका लागि लायक हो त ? एउटा कम्युनिस्ट पार्टीको सदस्यले अनुशासनको पालना गर्नुपर्छ । पार्टीको विधानको मातहतमा रहनुपर्छ । पार्टीको निर्णयलाई सर्वोपरी ठान्नुपर्छ र लोकतन्त्र, गणतन्त्रको पक्षमा, लोकतान्त्रिक आचरण र विधिमा उभिनुपर्छ भन्ने मान्यतामा पनि उहाँले कुल्चिनुभएकोले उहाँले कम्युनिस्ट पार्टीको सदस्य मात्रै होइन, लोकतान्त्रिक चेत समेत गुमाउनुभएको छ ।

ओलीलाई कारबाही गर्दा उहाँले पार्टी फुटाएर अर्को पार्टी गठन गर्नुभयो भने ?

पार्टी छोडेर हिँड्नुभयो भने उहाँको कुरा भो । कुनै पनि व्यक्ति कुनै पनि पार्टी नबस्न सक्छ, त्यो कुन ठूलो कुरा भयो र ? अर्काको पार्टीमा बस्छु भन्छ भने त्यो पनि ठूलो कुरा भएन । तर, उहाँ कम्युनिस्ट पार्टीको विरोधी हुनुहुँदोरहेछ भन्ने कुरा प्रष्ट भयो । नेकपाको पक्षपोषक होइन ।

मार्क्सवाद र लेनिनवादको मूल्य र मान्यताप्रति प्रतिबद्ध हुने कुरा त पर उहाँ त जनताको मतको कदर गर्ने मान्छे समेत हुनुहुँदो रहेनछ भन्ने प्रष्ट भयो । कम्युनिस्ट पार्टीप्रति जनताको अपार श्रद्धा र आस्थाको सम्मान गर्नुभएन भन्ने प्रष्ट भयो । उहाँ ढाँटछलमा विश्वास गर्नुहुँदो रहेछ । पार्टी पद्धतिलाई उल्लङ्घन गर्नु हुँदोरहेछ । उहाँलाई आफ्नो प्रधानमन्त्रीको पद वा कुनै पनि ओगटेको पद भन्दा ठूलो केही पनि लाग्दो रहेनछ । आफू रहिन भने कुर्सी भाँचिदिन्छु भन्ने मान्यता रहेको देखिन्छ ।

पहिले के हुन्थ्यो भने आन्दोलन र पार्टीका लागि  बलिदान दिन तयार हुन्थ्यौं । अहिले उहाँ आफ्नो निम्ति पार्टी र आन्दोलनलाई बलिदान दिन तयार हुनुभएको देखियो । भनेपछि पार्टी बलिदान गर्न सक्ने मान्छेले देश र जनताको हितमा कुठाराघात गर्नुहुन्न भन्न सकिँदैन ।

अब उहाँ (ओली) ले पूर्वएमालेलाई ब्युँताउने सम्भावना कति देख्नुहुन्छ ?

विघटित भइसकेको पार्टी ब्युँतिने कुनै सम्भावना नै हुँदैन । त्यसोभए त्योभन्दा पहिलेको मालेलाई ब्युँताइदिए के हुन्छ ? त्योभन्दा पहिले कोर्डिनेसन केन्द्रलाई ब्युँताइदिए के होला ? त्योभन्दा पहिले झापा जिल्ला कमिटीलाई ब्युँताइदिए के होला भन्नुहोला । त्यसको कुनै अर्थ छैन ।

भनेपछि तपाईंको विचारमा अझै नेकपा पार्टी एक ढिक्का रहन्छ ?

पार्टी एकढिक्का रहन्छ । पार्टी र आन्दोलन अगाडि बढ्छ ।

चुनाव त घोषणा भइसक्यो । अब यो चुनावमा पार्टी फुटेर जान्छ कि….

होइन, चुनावको प्रश्नै छैन । संसदको पुनर्स्थापना हुन्छ । त्यो निर्णय नै बदर हुनुपर्छ । मलाई विश्वास छ- हाम्रो सर्वोच्च अदालत संविधानको सही व्याख्या गर्ने जिम्मेवारी पनि पाएको छ र गलत कदमलाई रोक्ने महत्वपूर्ण भूमिका पनि उसकै काँधमा छ । त्यसले सही निर्णय गर्नेछ । रीट पनि दर्ता भइसकेको छ । संसदभित्रका समीकरणको जानकारी पनि भइसकेको छ । प्रतिनिधिसभाको विघटन हुनुभन्दा पहिले नै अविश्वास प्रस्ताव दर्ता गरिसकेका छौं । संसद सचिवालयका महासचिवको हातमा त्यो कागज पुगिसकेको छ ।

त्योभन्दा पहिले नै प्रतिनिधिसभाको ८३ जनाको (मन्त्रीबाहेकको) हस्ताक्षरको कागज नै राष्ट्रपतिको हातमा छ । भनेपछि के प्रष्ट छ भने संसदीय दलमा पनि उहाँको विपक्षमा बहुमत छ । सिंगो संसदभित्र पनि (प्रतिनिधिसभा र राष्ट्रियसभामा) उहाँको विपक्षमा बहुमत छ । त्यसो हुनाले अल्पमतमा परिसकेको मान्छेलाई विघटन गर्ने, कुनै पनि हकमा निर्णय गर्ने परिस्थिति नै बन्दैन । संविधानले पनि त्यस्तो अनुमति दिएको छैन ।

यसको अर्थ मुलुक मध्यावधि निर्वाचन र राजनीतिक अस्थिरताको भूमरीमा पर्दैन भन्ने तपाईंको निष्कर्ष हो ?

मलाई विश्वास छ, सर्वोच्च अदालतबाट न्यायिक फैसला हुनेछ । संवैधानिक इजलासबाट न्यायिक फैसला हुनेछ र गलत कदमका विरुद्ध उभिनका लागि र आफ्नो स्वतन्त्र संवैधानिक दायित्व बोकेको त्यो अंग, नियन्त्रण र सन्तुलन बोकेको अंगले सही फैसला गर्नेछ ।

तर अदालतबाट त्यस्तो फैसला आएन भने त निर्वाचनमा जानुपर्ने होला नि त ?

मलाई लाग्छ, अदालतबाट सही फैसला हुनेछ । संसद विघटनसम्बन्धी प्रधानमन्त्रीले चालेको कदमलाई बर्खास्त गरिदिने छ ।

प्रधानमन्त्री ओली संसद विघटन गर्ने अवस्थामा पुग्नुमा प्रचण्ड र माधव नेपालले कामै गर्न नदिएकाले हो भन्ने तपाईंहरूमाथि आरोप छ नि ?

त्यो कुरा बैठकमा ल्याए हुँदैन ? काम गर्न दियो वा दिएन भन्ने कुराका निम्ति बहस गर्ने ठाउँ कमिटी होइन ? कमिटीमा बहस गरे हुँदैन ? त्यो फैसला कमिटीलाई गर्न दिए हुँदैन ? कमिटीको बहुमतले एउटा कुरा भनिरहेको छ, त्यो कुरा मान्नलाई प्रत्येक व्यक्ति बाध्य हुनु पर्दैन ? बहुमतमा विश्वास छैन ? अनि लोकतन्त्रको कुरा गर्न सुहाउँछ ?

लोकतन्त्र र लोकतान्त्रिक आचरण बोकेका मान्छेले बहुमतको फैसला मान्नु पर्छ । बहुमतको फैसला र निर्णय नमानेर एकल पाराले चल्ने प्रवृत्ति लोकतान्त्रिक हुन सक्छ ? अधिनायक प्रवृत्ति हुन्छ । उहाँ (ओली) मा व्यक्तिवाद छ, निरङ्कुश प्रवृत्ति छ, एकाधिकारवादी प्रवृत्ति छ र सानो गुटको घेरामा थोरै मान्छेहरूको घेराभित्र आफूलाई कैद गर्नुभएको छ । उहाँले सिंगो समाज देख्नुहुन्न ।

देशको बारेमा उहाँलाई मतलब छैन, सिंगो पार्टीसँग मतलब छैन, उहाँलाई सिस्टम बसाल्ने कुरासँग कुनै मतलब छैन । उहाँ आई एम द स्टेट, आई एम द पार्टी भन्ने गलत प्रवृत्ति बोकेर हिँड्नुभएको छ । यसअर्थमा उहाँ डेमोक्रेसीका लागि ठूलो समस्याका रूपमा देखापर्नुभएको छ ।

आम कार्यकर्ता, जो नेकपा एकीकरणपछि खुशी बनेका थिए । अहिले निराश भएका छन् । उनीहरूलाई तपाईं के अपिल गर्नुहुन्छ ?

म भन्न चाहन्छु, पार्टी कार्यकर्तालाई पार्टीभित्र यस्ता प्रवृत्ति बोकेका मान्छेहरु नेतृत्व तहमा पनि पुग्दा रहेछन् । रुसको पार्टीमा गोर्वाचोभ र येल्तसिन जस्ता मान्छेहरू पुगेका थिए, जसले कम्युनिस्ट आन्दोलनलाई सिध्याइदिए । कम्युनिस्ट पार्टी नै विघटन गरिदिए । चीनको कम्युनिस्ट पार्टीमा पनि लिन पियाओ प्रवृत्ति बोकेका मान्छेहरू नेतृत्व तहमा पुगेका थिए । उनीहरूको हातमा नेतृत्वको बागडोर पुगेको भए त्यो चिनियाँ कम्युनिस्ट पार्टी पनि सिद्धिन्थ्यो । तर त्यहाँका नेताहरूले बुद्धि पुर्‍याए । माओत्सेतुङले बुद्धि पुर्‍याउनुभयो । तेङ स्याओपिङले बुद्धि पुर्‍याउनुभयो । त्यस्ता व्यक्तिहरूको पहिचान गर्नुभयो । त्यसैको प्रभावले पार्टी र आन्दोलन जोगियो । तर त्यही कुरा रुसको हकमा देखिएन ।

त्यसो हुनाले यस्ता गलत प्रवृत्ति बोकेका मानिसहरुबाट पार्टी र आन्दोलन जोगिँदैन । यस्ता प्रवृत्तिका विरुद्धमा लड्ने अभियानमा दृढताका साथ उभिनुहोस् ।

व्यक्तिहरु आउँछन्, जान्छन् । पार्टी र आन्दोलन रहिरहन्छ । पार्टी र आन्दोलनका निम्ति हामी जुटेका छौं । त्यसैका लागि नेकपामा आबद्ध भएका छौं । तसर्थ, पार्टी र आन्दोलन जोगाउनका लागि हिम्मत नहारिकन दृढतापूर्वक, उच्च मनोबल बोकेर, गलत प्रवृत्तिलाई परास्त गर्छु भन्ने संकल्प बोकेर अगाडि बढ्नुहोस् । किनभने संघर्ष नै जीवन हो । जीवन नै संघर्ष हो । पार्टीभित्र पनि गलत विचारको बीचमा संघर्ष गरेर नै त्यसलाई पराजित गरेर नै सही विचारलाई स्थापित गर्न सकिन्छ ।

त्यस्ता गलत विचारको पक्षपोषकहरु जोसुकै किन नहोऊन्, हामीले माया गरेकै किन नहोऊन्, त्यस्ता गलत प्रवृत्तिको पक्षमा नजानुहोस् । व्यक्तिका लागि पार्टीलाई बलिदान नगर्नुहोस् । व्यक्तिहरू हुन्छन्, पात्रहरू सुपात्र भइदिए हुन्थ्यो भन्ने चाहनाहरू हुन्छन् । तर त्यस्ता तत्वहरूको पक्षमा लाग्नुपर्ने कुनै आवश्यकता छैन ।

निष्कर्षमा भन्दा अब केपी ओलीमाथि अनुशासनको कारबाही हुन्छ । तर पार्टी फुट्दैन, एक भएर जान्छ भन्ने तपाईंको दाबी हो ?

पार्टी फुट्दैन, पार्टी एक ढिक्का हुन्छ, कोही मान्छे जान्छ भने चोइटिएर जान्छन् । त्यस्ता व्यक्तिका पछाडि कोही व्यक्ति सति जान हुँदैनन र सति हुने मान्छेलाई ‘भिरमा लड्ने गोरुलाई रामराम भन्न सकिन्छ, काँध थाप्न सकिँदैन ।



leave a comment
तपाईको समाचार, लेख /रचना वा सुझाव भएमा info@parbatkhabar.com मा पठाउनुहोला । यस पर्ब-खबर (www.parbatkhabar.com) मा सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । हाम्राे कुनै पनि समाचार अनुमति विना साभार गरेको पाइएमा हामी प्रेस काउन्सिल ऐन अन्तर्गत कारबाहीको प्रक्रियामा जाने छौ ।